WWF Հայաստանը աջակցում է մարդու և գորշ արջի միջև կոնֆլիկտի մեղմացմանը

Posted on 23 August 2022

«Ընձառյուծի պահպանությունը Հարավային Կովկասում» ծրագրի շրջանակներում մարդու և գիշատիչ կենդանիների միջև կոնֆլիկտի մեղմացման նպատակով Բնության համաշխարհային հիմնադրամի հայաստանյան մասնաճյուղը (WWF Հայաստան) Արարատի, Վայոց ձորի և Սյունիքի որոշ գյուղական համայնքների բնակիչներին էլեկտրական հովիվ է տրամադրել։

Մարդու և գիշատիչ կենդանիների միջև կոնֆլիկտը ծրագրի մշտական մտահոգության առարկաներից է։

Հայաստանում ընձառյուծի ցածր թվաքանակով պայմանավորված, ինչպես նաև հաշվի առնելով դրանց` առանց որևիցե լուրջ անհանգստություն պատճառելու մարդկանց հետ գոյատևելը՝ 2021 թվականից ծրագիրը անդրադարձել է նաև Հայաստանում մարդու և գորշ արջի միջև կոնֆլիկտի մեղմացման խնդրին։

Գորշ արջի պահպանության արդյուքում, վերջինիս թվաքանակի աճով պայմանավորված, Հայաստանի տարբեր մարզերում՝ մասնավորապես Արարատում, Վայոց ձորում և Սյունիքում, որոշ գյուղական համայնքների բնակիչներ կրել են գյուղատնտեսական վնասներ։ Սա հիմնականում վերաբերում է այն դեպքերին, երբ գորշ արջերի կողմից վնասվում են պտղատու ծառեր և մեղվափեթակներ։

«Փորձելով մեղմել խնդիրը և ուսումնասիրելով ծրագրի թիրախային համայնքների ներկայացուցիչների առանձին դիմումները՝ WWF Հայաստանը բնակիչներին տրամադրել է էլեկտրական հովիվ՝ այսպիսով ապահովելով գորշ արջերի անվտանգությունը՝ միևնույն ժամանակ պաշտպանելով այգեպաններին և մեղվապաններին նոր վնասներից», - նշեց WWF Հայաստանի Հասարակայնության հետ կապերի ղեկավար Ժակ Նիազյանը։

«Ընձառյուծի պահպանությունը Հարավային Կովկասում» ծրագրի շրջանակներում WWF Հայաստանը շարունակում է աջակցել ագարակատերերին և միջոցներ ձեռնարկել՝ ուղղված Հայաստանում գիշատիչների և մարդկանց համագոյատևմանը։

Վերոնշյալ խնդիրը՝ կապված գորշ արջերի հասցրած վնասների հետ, արդիական է ոչ միայն Հայաստանում, այլև շատ այլ երկրներում։ Ամենուր կիրառվող էլեկտրական հովիվը ամենաարդյունավետ միջոցներից է արջերի կողմից հասցված վնասը կանխելու գործում։ Այն արդեն իսկ ցույց է տվել իր օգտավետությունը նաև Հայաստանում։